Archivo del autor: xunego

Esti ye’l discursu que fice, nel 8u Congresu Nacional de Repunantes, por mor del nomamientu de mio como Repunante d’Honor. La Pola (Llaviana), a 22 mayu del añu 2021.

Presidente ya Repunante d’Honor: David EME Rivas; Repunante d’Honor: David Castañón Fartañón Golosón; Repunantes Diplomaos; xente repunante esin diplomar (todos, todas ya todes).

Güei quiero facer repunar, tolo que pueda, fasta Fidel Castro incluyíu si pudiere, col discursu que teo nes manes de mio… Anque tamién pensé de repunar en serio, masque eso diba dar que munchos, güei, nunca nun cenaren. Polo tanto, voi ser un pocoñín bono.

Lo d’arrecibir esta distinción, nun ye arguyu nin ye satisfación: MERECÍALU; esin más. Por aguantavos, a los Repunantes, ya por vivir (yá falo de sieglos) nun país perguapu ya ablucante (GRACIES FONDERES al mio YO SOY, al ser espiritual propietariu d’esti cuerpo de lluz que m’unvió fasta estes tierres), masque tamién enllenu de babayos (porque fatos, al paecer, yá hai abondos pa Lluanco); babayos que dicen querer democra¿qué? ya elixen los que tán; babayos qu’alaben los lladrones ya reburdien de los paisanos; babayos que nun pueden ver al vecín delantre ya afalaguen a los madrilanos; babayos qu’arrenieguen la tierra de so ya faen foles a los subpayarianos; babayos que caguen (o quieren cagar, porque hai muncho estreñíu) pa con tolo qu’arreciende ASTURIES (Asturies con mayúscules).

Nun quiero escaecer que güei tamos equí porque diome la gana, anque’l primer sitiu yera outru un pocoñín más lloñe d’equí: les tierres d’Illas, onde viví los cimeros años de la vida de mio. Illas ya Llaviana, conceyos hermanaos por mor del escritor Armando Palacio Valdés, allá por ochobre del añu 2016. Poro, güei, tamos equí, en El Pintu, pa La Pola Llaviana, gracies les ganes, los ovarios ya los tolanos de Zori ya Diego, ya les ganes de querer aguantamos ya les perres la faltriquera querer sacamos. Naguo porque la cena tea bona porque sinón va haber hule ya más qu’hule. Neto que tamién tamos equí, en parte, por ver si d’una vegada averiguamos el misteriu que tien Llaviana: Ovidio, Marcos Abel, Súper Barbón; agora tamién Adrián… ¿Qué fizo Llaviana pa que surdieren, d’equí, tanto políticu ya tan pouca política? Ver, veremos, si somos a ello nesti Congresu Nacional de Repunantes.

Quiciabes yera bono, con tanta xente nuevo güei equí, que-yos diga dalgo alredor d’esti que ta falando. Equí va una esbilla: Ñací “cabra” pa Illas; ya pasé munchos branos pal conceyu Miranda. Tamién tuvi la suerte que los pas m’ “obligaren” facer más d’un campamentu fora del pueblín (dalgún fuere de la OJE). Coñocí ya senteme nos pupitres de madera; dempués “esportáronmos” p’Avilés (naquelles famoses concentraciones). Estudiaba curioso fasta que sufrí unes “violaciones amoroses primaverales” ya la infancia dexó’l maxín entrando nél la mocedá, les entrugues ya la rebeldía (muncho, tamién, fora comportamientu grupal). Tuvi la suerte, que nun supe pescanciar fasta munchos años dempués, de morrer ya tornar vivir nesta vida. Dempués, cola mayoría d’edá, escapé de casa ya púnxeme trabayar; ya nun yera fácile, masque resistí, ya con nota alto, nel mundiu’l montaxe. Dexelo unos meses p’ “ayudar la patria”, onde deprendí lo que yera la galbana, la corrupción ya munches outres coses positives de verdá: ún d’elles, l’amistá con dos amigos que, siempres que podemos, aconceyamos ya riimos, bebemos, comemos ya pasámoslo perbien. Tuvi negocios hosteleros ya outros, anque enantes fui gocheru, esto ye tratante de ganáu (asina que curiáu, que cola cuchiella ayudé ya capé munchos, miles, gochos ya goches); tamién tocome corar dellos, asina como oveyes, cabres ya demás; esin escaecer los miles qu’aporté fasta’l mataderu. Percorrí munchos llugares trabayando. Crucié’l charcu unes cuantes vegaes ya fice dalguna qu’outra escursión per Europa. Tamién sé lo que ye camudar de casa, muncho más que la mayoría. Amé ya fui amáu; agora ámome yo mesmu. Va tiempu que dixe que vivir nun yera morrer ya qu’hebía d’haber dalguna forma de vivir nesti mundiu de forma estremada; perres me cuesta ya dalguna dificultá, masque esfruto los dis pente la ñatura. Anguaño, amás de repunar enforma, toi con una reinvención más de mio; ye lo que tien tener el calter d’esplorador…

Va dalgo más dos años, cuando-y comunicamos el nomamientu como primer Repunante d’Honor al nuesu Presidente Supremu, David EME Rivas, dexó dichu que como agradecimientu d’ello diba apurrimos, pal 6u Congresu, allá por ochobre del añu 2019, los DIEZ MANDAMIENTOS del Repunante… Yá equí tamos, naguando por ellos… Colo que me diba prestar xuralos a la vera d’esti xoven ya sagráu carbayu, con fueyes, como facíen los antepasaos de nueso. Mira ver si dexes de da-y a la fesoria-golf ya de facer argayos coles boles que llances escontra l’outru llau la valle ya mos apurres (nun fai falta que vengan acompangaos de dos xatos blancos) los mandamientos… Tantos blogues, tanta radio, tanto ron xamaicanu ya los repunantes esmolecíos esin ellos. POR FAVOR, David.

Esti discursu de mio va xirar al rodiu les pallabres escrites nel comunicáu oficial, poles que’l Conceyu Repunantes citó como parte importante pa dame esti recoñocimientu; amás de considerame ún los fundadores d’esta sagrada secta: esto ye, pLandemia ya sociollistos.

Hai xente que nun atalanta que de munchos años p’acó, mos preste o non, vamos todos escontra la unidá como seres humanos; bono, todos non: equí nun hai llugar, por muncho amor qu’esista ya qu’haiga qu’esparder, pa los PUTOS NAZIS ya FASCISTES; tamién pa los que los sofiten (andái con curiáu). Pues asina ye qu’hai que considerar, ya nun facer foles al Sol, la xera la pLandemia. Más de 14 meses esin drechos ya esin llibertá pero lo más peligrosu ye que, por primer vegada, permitimos que se metiere la xente sano nel mesmu llugar que la xente enfermo (debe ser que como pa Spanishtán vien de la mano la xente qu’entamó’l terrorismu d’estáu, lo mesmu acoyonamos del tou). Masque, tamién, ye cenciellu ya davezu’l sentir que xente llama outra xente “conspiracionistes”, “ñegacionistes”, como a mi. Anque si nun queréis emprimala, podéis dir camudando eses pallabres pola pallabra RESPIRACIONISTES. Ya ye que’l mundiu, dende va munchos años, sin nun lu güeyáis entá, va camín de quedar como’l ganáu: en cortes los que menos suerte tengan, en praos zarraos con allambre d’espín los que-yos presta ser rebañu ya poles brañes ya mayaes los más llibertarios. Anque unos albidren más llibertá qu’outros, TODOS, zarraos ya controlaos penriba ya por baxu. Demientres, mos enguaden con guerres p’allalantrón, donde cuasi siempres, a los que tenemos la suerte d’esfrutar de couses nunca nun soñaes pol 80 % del restu del planeta, ya equí mos tán tarazando pali que pali con más mentires ya, cada vegada más, con menos drechos. Ya ye que si los que podemos camudar les coses, ellos sábenlo, nun facemos res, el restu va rendise fácile anque seyan miles de millones. Una pLandemia con una tasa “letalidá” (de muerte pa los oficialistes), recoñocía poles autoridades europees ya mundiales que nun algama cuasi’l 0,15 % los supuestos contaxaos; con más del 99,5 % la población mundial sano. Una pLandemia apocalíptica, con un andanciu perintelixente, qu’ataca nos chigres masque respeta nos ALSAS, qu’ataca si mos aconceyamos más de SEIS nun restorán masque respeta si mos atopamos nel ALIMERKA un ciento d’ellos, que mos ataca si vamos trés pela cai esin bozal masque respeta si son 25 xuntos ya revueltos tres d’un balón. Nun voi siguir asina porque teo fasta que’l mundiu-y de por finar. Masque sí voi apurrir datos ya información que, dalgunos, comos sois “espertos”, podéis buscar ya comprobar. Podemos entamar col Dr. Pierre Gilbert, es-masón gradu 30, que tres arrenunciar dedicose denunciar l’axenda del Nuevu Orden Mundial ya la élite que mos controla, allá pol añu 1995 (va más de 25 años), onde falaba alredor del desaniciu biolóxicu por mor los campos electromagnéticos ya la inyección de contaminantes ya cristales llíquidos, que diben furrular como microreceutores al traviés del sangre, asina como lleis que diben obligar vacunase la xente. Qué voi dicivos de los famosos ya inefables prebes PCR, que dende l’entamu, fasta la OMS, si nun abastaba colo que dixo quien los inventó, dixo que fallaben más que les escopetes de feria. A di de güei, que ye lo que cunta, sábese que modificando los ciclos con que se faen les prebes, dan unos resultaos u outros: esto ye, a más ciclos más fallos ya más falsos positivos; ya con menos ciclos más exactitú ya menos infectaos. Masque claro, como esi ye’l pegoyu cimeru pa la pLandemia… Más de recién ye la noticia, por parte científicos norteamericanos ya que nun son “ñegacionistes” (ya que nun salen na tele), con fecha del 3 mayu, o seya esti mes, que’l COVID nun ye una enfermedá pulmonar sinon vascular, ya d’ehí esos trombos nos pulmones. Más de recién, el pasáu di 10 d’esti mes tamién, la EMA d´Europa (Axencia Europea del Melicamentu) recoñoz que la vacuna AstraZeneca provoca unos trastornos neurodexenerativos raros; anque tán tamién “estudiando” sobro casos reportaos de Síndrome de Guillain-Barré asina como efeutos reportaos, poles vacunes Pfizer ya Moderna, d’inflamaciones cardíaques. Tamién, ya’l traviés del New York Times (pa que nun critiquen los covidianos que nun apurro fontes series), súpose lo que dixeron los CDC “yankees” sobro les probabilidaes d’espardimientu del virus chinu al aire dende Wuhan (en China), que foi namái un 1 % envede’l 10 % que camentaron al entamu (recordái qu’esto más les prebes PCR foron los que ficieron que los gobiernos obligaren facer usu del bozal ente la xente sano).

Llueu ta la xera los sociollistos, anque enantes hai outru “ente/ser” que lo únicu ye que tien un nome que ye perguapu; España (na so forma orixinal de la llingua más vieya la Tierra, de la nación más vieya d’Europa). Ya haber si españa darréu. ¿Hebrá cosa más guapa qu’un españíu…? Home va, si non ye asina ye que nunca nun aportáteis fasta Cangas nel mes de xunetu.

Pues sí, esa xera los sociollistos, los demócrates (que nunca nun tien res que ver con Sócrates nin con ácrates), los republicanos monórquidos, los que van colos de la feria ya tornen colos del mercáu, los mayores esfarrapadores d’Europa, los que sofiten lladrones, los mayores desaniciadores d’Asturies… Ya nun lo digo yo namái; tán ehí los datos ya les sentencies xudiciales. Col cabezaleru de so, el Pablo Escobar d’Asturies, repartiendo vacunes ente los más desfavorecíos del país de nueso; l’amigu los sermones ya los mantras, di sí di tamién. Como’l mantra que repite davezu, nesta pLandemia, que siempres entama colo de “la OMS (organización mafiosa supranacional) dixo esto”, “la OMS dixo l’outru”… Anque, elli, Súper Barbón, nun parez cumplir eses directives; polo menos no que cinca la resolución WHA55.23 que surdió de la 55ª Asamblea Mundial de la Salú, el 18 mayu del añu 2002, sobro’l “Réximen alimentariu, l’actividá física ya la salú”, nel qu’INSTA ameyorar el réximen alimentariu ya engromecer l’actividá física, que diz que son los factores responsables del 60 % les muertes ya’l 43 % la carga mundial de la morbilidá ya que, pal añu 2020, diben algamar el 70 % ya’l 60 % respeutivamente. Ya digo esto por nun criticar, ¿acuéi? Porque si ya mos cuesten perres abondo los políticos que dicen representamos sanos (trabayando media xornada namái 7 meses al añu), imaxinái lo que diba ser esi gastu con enfermedaes ya mancadures varies; como la cabera GASTRALXA, lo que bien ser, de tola vida, un empachu descomunal; dicen les males llingües de mil fueyes fechos pa Les Arriondes (sí, agora fai tiempu escaecióse del perbonu chorizu Bimenes pa dir poles llambionaes). Si vos atopáis con elli, con Súper Barbón, güei tamos pa La Pola Llaviana, el pueblu del llar de so, onde s’avera los fines de selmana por una muda llimpio, habéis de tener curiáu, non porque vos pegue l’andanciu, más bien pol botón la chaqueta si la lleva puesta; porque val más cuasi saltalu que rodealu. Esi ser superior que mos obliga, bono más bien a vosotros, a llevar el bozal perende masque la xente pa La Calzada, qu’en condiciones normales, debería caleyar, dende fae muncho tiempu, con mázcares antigas pola contaminación que padecen, di sí ya di tamién; contaminación que, ya asigún datos, causa muertes pol tou’l planeta, menos p’Asturies gracies a los convenios col arzobispáu ya les mises pa Cuadonga. Esi cabezaleru perdemocráticu que bloquea toudios (ún d’ellos soi yo) que nun-y fae una fola al di nes redes sociales. Esi ser superior que diz que defiende los intereses d’Asturies “por tierra, mar ya aire”; no de la tierra, ta mui clariquino, ya sinón mirái como cuida los ALSA; nel aire, que-y entruguen al “indiu” cuándo foi la cabera vegada que pagó una multa por contaminar; ya pol aire hebía que facer una investigación a ver porqué los billetes d’avión cuesten lo que cuesten a los asturianos ya tienen eses ablucantes conesiones colos aeropuertos del mundiu. Esi sociollistu que diz defender los drechos los trabayadores, como l’enguade que-yos metió a los trabayadores d’Alimerka en mediu unes fiestes navidiegues; o como los que mandó escontra la muerte pal Puirtu Braña (San Isidro pa los católicos). Esi Súper Barbón “amable” pa cola llingua del país de nueso: l’asturianu; que permite atrocidaes con doble intención spanishorca pa tapecer la realidá llingüística, como lleven faciendo los sociollistos nos más de los 40 caberos años. ¿Nun sé yo cómo son a vivir xentes, foriatos ya llariegos, pa les tierres de Mallorca, onde tuvo esiliáu Xovellanos, cuando s’atopen ya lleen lletreros con nomes (esin duplicidá) como Valldemosa, Capdepera, Sa Pobla, Bon Any, Illetes, etc, etc.

Podía siguir cola matraca los sociollistos un sieglu tres outru, anque nun lo voi siguir faciendo; non porque nun tanga ganes, sinón porqu’esti di ye’l de mio ya nun quiero poneme Repunante con dos erres al entamu. Anque, agora que doime cunta, hai güei equí, nesti Congresu, aparte xente nueva hai un garrapiellu de FORO: ¿qué ye FORO?

Nun lo sé entá, anque ocúrrenseme unes cuantes definiciones pa esi acrónimu:
– Fundación Obrera Revolucionaria d’Olloniegu
– Francisco Álvarez-Cascos Oprimíu Revolcáu ya Olvidáu
– Frente Oscuru polos Reyes ya Obispos
– Fartures Opulentes pa Ricachones Opulentos
– Fundación pola Ópera Real de Oviedo
– FORO ye igual a Madriz

Agradeceyos, de verdá, la valentía d’averase fasta un llugar que, dende lloñe, pue parecer “amable”, masque de cerca ye peligrosu como vais comprobar. Al paecer perdísteis el Norte, por eso nós vinimos, con esti Congresu, pal Sur; anque yá veis el resultáu: tán equí. Ya como van facer el 4u Congresu, quiciabes-yos preste ya-yos vaya bien dalgún conseyu de los que yá vamos col 8u, ¿verdá? Dalgo aseméyanse con nós, como lo de querer facer couses ya nun camudar los cargos; equí namái tenemos la opción de facer un golpe d’estáu (yá hebo un intentu d’entamar ún), sinón a David EME Rivas nun lo echen nin con augua ferviendo. Van convertise, que nunca ye lo mesmu que ser, dicen ellos (curiáu que cunten con 8000 afiliaos masque namái paguen 2000; como nós: millones de repunantes ya namái pagamos los qu’equí tamos), nuna organización “autonomista” (esto debe ser como faen los coches Tesla, van dir esin conductor perende), reformista (curiáu coles llicencies d’obres, sobro tou pa Xixón; recomiéndovos dir de romanos ya dicir que vais facer dalguna estatua romana nueva), transversal (agora los que tenéis de tener curiáu sois/somos los que tais/tamos fuera; nun vayan mancavos/mos con dalgo) ya, al güeyu, de centru ya centraos n’Asturies…(Vamos ver, ho ¿nun hebíais perdíu’l Norte?) Ya, amás, dempués de camudar tantes couses, ya siguir siendo lo mesmu, ¿qué vais facer colo de la OFICIALIDÁ? Porque nel caberu alderique col sociollistu Súper Barbón, aparte’l ruíu la espada alcontrada, “Barbónida”, nun pescancié res de res: bono sí, esi mantra que repetíis pa Madriz, di sí ya di también: viva la Prostitución, perdón, la constitución; viva el rey (como si viviera mal yá); ya viva españa (¿eso ye que tais a favor dalgún golpe d’estáu?; dígolo polo d’españar). De verdá, nun vos esmolezcáis colo de separtavos la corrupción porque, los sociollistos ya los gaviotos, tán condergaos por ello ya nun-yos va mui mal. No que cinca p’algamar xente pal proyectu de vueso, tais con una oportunidá hestórica ya, de pasu, mandar p’allalantrones los sociollistos (yá apareceremos nós dempués d’ello). ¿Cómo? Cenciellu. Convocáis una rueda prensa diciendo que queréis la OFICIALIDÁ darréu ya que vais presentar moción pa votar nel parllamentu asturianu enantes del branu (lo mesmu nun vos da tiempu, colo de les vacaciones de la santa selmana). Díbeis algamar munchos más votos lo que pensáis ya díbeis poner, de verdá, los sociollistos delantre la opinión pública: nun quieren res de res p’Asturies ya los asturianos (bono, les perres la corrupción, sí) ya diben tener que votar ya la xente, la de la esquierda “guachiné”, saber la verdá.

Bono voi terminar que, de xuru, tenéis fame (yo tamién). Agradecevos, de verdá ya fonderamente, esti di pa conmigo ya que, si podéis ya si vos atrevéis, saltéis, de xemes en cuando, la sebe. Porque una sebe nun ye nada, masque trés sebes son una oveya; trés oveyes ún caballo; trés caballos ún paisanu; trés paisanos ún cuervu; trés cuervos ún carbayu; trés carbayos ún teixu; ya trés teixos ún reinu. Yá pasaron munchos reinos ya la repunancia sigui viva ya con punxu.

¡¡PUXA LA REPUNANCIA!! ¡¡PUXA LOS REPUNANTES!!

¡¡PUXA ASTURIES!! (si pue ser DIXEBRÁ)