D’equí unos díis, torna otra vegada eso de cumplir años… de nueu. Non ye que-y tenga rocea, non. Ye que paez que sólu-y damos vraera importancia a un díi ya escaecemos otros 364 (cuandu non ye bisiestu)… Ya ye lo que me voi dando cunta colo de cumplílos: dexamos pasar munchos díis esin cellebrar ya, asina, tamién dexamos de vivir ya compartir esos outros pequeños migayinos que tamién formen parte de la nuesa vía.
Ya la vía d’un ye perimportante; ta pernidiu. Poro, pa la humanidá, non lo ye tantu. Ye como lo que falaba, va unos díis, alrodiu de los árbores; que llevan equí, nel planeta, muncho más tiempu que nosotros ya non somos capaces d’entrugános que ye lo que faen p’algamar ese ésitu (aparte de que son muncho más llonxevos que los humanos). Ya güei, apenas a 24 hores de tornar cumplir años, viénme a la tiesta la hestoria d’un árbore que cellebra, namás ya namenos, 4.847 años (anque pa muncha xente el más vieyu ye otru que ta’n Xapón, Jōmon Sugi, con una edá sobro los 7.000 años). ¿Ya sabéis cuál ye’l nome que-y punxieron? Pues Matusalén…
Anque hai munchos que pasen de los milenta años, pocos son los humanos qu’algamen a ser centenarios. Ya ye que pensamos que la vía, nesti planeta, vamos esfrutála per siempres, ya non ye verdá. Alcuérdome, munches vegaes, da la cena d’Añu Vieyu del añu 2000, na que entá vivía mío güelu maternu, Xuan el de la Casa la Veiga, (que coló con 99 años, tou un ésitu) ya que faló que ya podía morrer tranquilu… A lo que-y entrugamos que ¿por qué?, si taba perbien de salú (daquella tinía 95 años). El retrucó que tanto-y falaron, de mozu, que cuandu s’averáse’l’añu 2000, la xente diba vivir esin esfuerzu ya perbien; poro, pa elli, taba tou pior; la xente non falaba nin se saludaba (avezáu a vivir nuna casería d’un pueblin del conceyu de Miranda , Albariza, treslladóse fasta Avilés a vivir nuns edificiu de 10 plantes ya cuatru cases per planta) ya los coches siguían esin volar (esu riéndose). Pues eso ye, qu’hai que vivir esin naguar res, nin de naide. Esfrutá-y, ya muncho, de la via; que yo asina voi siguir faciéndolo.